1Cor 5 | BOJ | STEP | O was qu, e anjam bei endegsi quem. Nuŋgo ambleq di tamo bei a sambala kumbra yeqnu. Aqa sambala kumbra di tulaŋ ugedamu. Tamo naŋgi Qotei qaliesai qaji naŋgi sambala kumbra deqaji yosaieqnub. Aqa sambala kumbra agiende. A na aqa abu aqa ŋauqali olo oqnsiq ombla sambalaeqnub.

1 Corinthians 5

Sambala kumbra a Korin naŋgo ambleq di soqnej

1 O was qu, e anjam bei endegsi quem. Nuŋgo ambleq di tamo bei a sambala kumbra yeqnu. Aqa sambala kumbra di tulaŋ ugedamu. Tamo naŋgi Qotei qaliesai qaji naŋgi sambala kumbra deqaji yosaieqnub. Aqa sambala kumbra agiende. A na aqa abu aqa ŋauqali olo oqnsiq ombla sambalaeqnub. 2 Tamo di a sambala kumbra di yeqnu deqa niŋgi are ugeiŋgonaq akamosaieqnub. Niŋgi diqoqnsib laqnub. Niŋgi are ugeiŋgej qamu niŋgi tamo di osib nuŋgo ambleq dena taqal waiyeb qamu.

3 O was qu, e niŋgi koba na sosai. E isaq endi unum. Ariya ijo areqalo niŋgi qa unu deqa e niŋgi ti sobulejunum. Deqa e sambala tamo di aqa une qa pegiyonum koboqo. 4 Deqa e niŋgi endegsi merŋgwai. Niŋgi gago Tamo Koba Yesus aqa ñam na korooiye. Yim koroq dia e niŋgi ti sobulitqa Tamo Koba Yesus aqa siŋgila dego nuŋgoq di sqas. 5 Niŋgi koroesosibqa tamo di ojsib Satan aqa baŋq di atibqa Satan na a osim aqa jejamu gulube yqas. Yim mondoŋ Tamo Koba Yesus a olo bqajqa batiamqa Qotei na tamo di aqa qunuŋ olo oqas.

Korin naŋgi na tamo uge di wiyib gilem

6 Niŋgi nuŋgo segi ñam soqteqnub di kumbra bolesai. Niŋgi qalie, tamo naŋgi sum kiñala oqnsib bem ti bulyeqnab bem tiyekritoqnsiq tulaŋ kobaqujaeqnu. 7 Deqa was qu, niŋgi na bem tiyeqnu qaji aqa sum namij di taqal atiye. Osib dena niŋgi olo bem bunuj bulosib sum saiqoji sqab. E qalieonum, niŋgi sum saiqoji unub koboqo. Di kiyaqa? Bem Tiyosai Qaji Uyqa Bati qa naŋgi na Kristus qalnab a kaja du bulosiq gago une qa moisiq aqa leŋ aiej. 8 Deqa iga Bem Tiyosai Qaji Uyqa Bati di unsim bem tiyeqnu qaji sum namij di uratosim olo bem bunuj sum saiqoji unu qaji di oqom. Sum namij di gago une ti gago kumbra uge ti sigitejunu. Ariya bem bunuj sum saiqoji unu qaji di are bole ti anjam bole ti sigitejunu.

9 E nami anjam endegsi neŋgreŋyosim niŋgi qa qariŋyem, “Niŋgi sambala tamo naŋgi koba na laqnaib.” 10 Ariya niŋgi tamo naŋgi Yesus qaliesai qaji naŋgi koba na laqnaib e degsi niŋgi merŋgosai. Niŋgi naŋgi koba na laqnqa kere. Tamo naŋgi sambala kumbra yeqnub qaji ti mandam qa ñoro qa maulnjreqnu qaji naŋgi ti gisaŋ na tamo naŋgo silali yainjreqnub qaji naŋgi ti gisaŋ qotei qa loueqnub qaji naŋgi ti niŋgi naŋgi koba na laqajqa e deqa niŋgi saidŋgosai. Niŋgi naŋgi koba na laqasai di niŋgi torei mandam uratqab. Di keresai. 11 Ariya tamo bei a marqas, “E nuŋgo Kristen was bole.” Osim a olo sambala kumbra yqas kio tamo bei aqa ñoro qa maulyqas kio gisaŋ qotei qa louqas kio tamo naŋgi misiliŋnjrqas kio ya uge uyoqnsim nanarioqnqas kio gisaŋ na tamo naŋgo silali yainjrqas kio Kristen tamo di niŋgi koba na laqnaib. Niŋgi a ombla iŋgi uyoqnaib dego. Agi e nami anjam deqa neŋgreŋyosim niŋgi qa qariŋyem. 12 Deqa e kiersiy marqai? Tamo naŋgi Yesus qaliesai qaji naŋgo une qa e na peginjrqai e? Sai. Di ijo wau sai. Ariya Kristen tamo naŋgo une qa peginjrqajqa di nuŋgo wau tiŋtiŋ. 13 Tamo naŋgi Yesus qaliesai qaji naŋgo une qa Qotei a segi na peginjrqas. Ariya Qotei aqa anjam bei nami endegsib neŋgreŋyeb unu, “Niŋgi na tamo uge di osib nuŋgo ambleq dena taqal waiyiye.”